السبت، 12 يونيو 2010

حسبنا الله و نعم الوكيل

لما معيد (مادة تالتة) يسألك قبل السيكش على حل الشيت اللى هو داخل يشرحه يبقى أنت أكيد أكيد CSE
----------------------------------------
لما (معيدو) نفس المادة يسألوا واحد من الطلبة عن الأسئلة اللى ممكن يسألوا فيها الناس جوه اللاب يبقى أنت أكيد أكيد CSE
----------------------------------------
لما نفس المعيدين يبقوا مش فاهمين الdesign بتاعك و يقنعوك انه غلط و بعد ما يسكتوا تقنعهم انت انه صح فييقوا مش عارفين (ينطقوا) يبقى أنت أكيد أكيد CSE
----------------------------------------
لما نفس المعيدين يسألوك فى الحاجات اللى ناس تانية كانت عملتها bonus و ينقصوك عليها يبقى أنت أكيد أكيد CSE
----------------------------------------
لما واحد من المعيدين يسألك سؤال و فى الآخر هو ميعرفش إجابته و يقولك "ابقوا اسألوا الدكتورة" يبقى أنت أكيد أكيد CSE
----------------------------------------
لما المعيد ميعرفش حل مسألة داخل يشرحها يبقى أنت أكيد أكيد CSE
----------------------------------------
لما تسأل الدكتورة و هى كمان متعرفش تحلها صح يبقى أنت أكيد أكيد CSE
----------------------------------------
لما الكتورة تجيب المسألة فى الإمتحان يبقى أنت أكيد أكيد CSE
============================
============================
لما معيد مادة (رابعة) يبقى عايز ينزل lab و من غير ما الدكتورة تقوله يبقى أنت أكيد أكيد CSE
============================
============================
لما معيد مادة (خامسة) يحل سؤال ليلة الإمتحان غلط و كل الدفعة تبقى واثقة إنه غلط و معظمهم يعرف يجيب الحل الصح يبقى أنت أكيد أكيد CSE
----------------------------------------
لما نفس المعيد يعمل نفسه فاهم فى مادة تانية (يا عم افهم مادتك الأول) يبقى أنت أكيد أكيد CSE
----------------------------------------
لما يقولك متطلبوش تأجيل من الدكتورة (امال نطلب من مين يعنى !!!) يبقى أنت أكيد أكيد CSE
----------------------------------------
لما تكلم الدكتورة و هى توافق !!!!!!!!!!!!!! يبقى أنت أكيد أكيد CSE
============================
============================
لما ينزلك مادتين من مواد الماجستير و أنت لسه undergraduate علشان مفيش دكاترة يدرسوا المواد الundergraduate يبقى أنت أكيد أكيد CSE
----------------------------------------
لما 4 سنين مش عارفين نتفق منسلمش لاب واحد و كل الدفعات التانية بتعمل كده و منهم اللى قفل الفصل أسبوع يبقى أنت أكيد أكيد CSE
----------------------------------------
لما كل الدفعات اللى خلقها ربنا يبقى ليهم forum و احنا نصمم على الyahoo group يبقى أنت أكيد أكيد CSE
----------------------------------------
لما تلاقى جايلك 20 رسالة كلهم عبارة عن تهنئة بعيد ميلاد واحد ولا تعزية لواحد يبقى أنت أكيد أكيد CSE
----------------------------------------
لما تلاقى واحد يشتم ولا يبعت mail اى كلام و يتهدد انه حيتحذف من group يبقى أنت أكيد أكيد CSE
----------------------------------------
لما واحد تانى يعمل نفس الموقف و نفس الشخص اللى هدد قبل كده يبعت يقول ده الايميل كان مبعوت غلط يبقى أنت أكيد أكيد CSE
----------------------------------------
لما كلمة "كوسة" تبقى عيب و (الخمس خمسات) تبقى عادية يبقى أنت أكيد أكيد CSE


ملحوظة:
كنت ناوى أنزل الجزء ده تحت عنوان "يبقى أنت أكيد أكيد فى CSE - الحلقة الثانية" و كمان بعد الإمتحانات ما تخلص
بس بعد اللى حصل النهاردة حبيت أنزله دلوقتى و تحت عنوان "حسبنا الله و نعم الوكيل"
بجد بجد بجد الواحد بقى مش بيحس إنه متضايق من أى حاجة تحصل حواليه و بحس إن كل اللى بيتكلم عن البلد و عن المشاكل اللى فيها بيضحك على نفسه لأن على رأى الناس اللى إحنا عاملينهم مثل أعلى لينا "لازم نبدأ بنفسنا الأول"
يبقى نشوف الأول اللى بيحصلنا جوه القسم و بعدين ممكن نتكلم عن أى مشاكل بره بعد كده
مش يبقى على رأى المثل "مقدرش على ****** اتشطر على *******"

الأربعاء، 9 يونيو 2010

يبقى أنت أكيد أكيد فى CSE (الحلقة الأولى)

لما الدكتور يخبى عنك آخر محاضرة يبقى أنت أكيد أكيد CSE
-----------------------------------------
لما المحاضرة دى بقى تنزل فجأة بعد ما نصورها من الدفعة اللى قبلنا يبقى أنت أكيد أكيد CSE
-----------------------------------------
لما نفس المحاضرة دى ميجيش منها حاجة فى الامتحان بعد كل وجع الدماغ ده يبقى أنت أكيد أكيد CSE
-----------------------------------------
لما تسأله عن إمتحان العملى حيبقى فى إيه و يقولك مش عارف ممكن أى حاجة اعرف انك فى CSE
-----------------------------------------
لما المعيد ميديش e-mail الدكتور لحد علشان يسأله يبقى أنت أكيد أكيد CSE
-----------------------------------------
لما تشوف مسألة لأول مرة فى المادة جوه الامتحان مع إن مفيش مسائل قبل كده فى المنهج أو الشيت أو الإمتحانات السابقة يبقى أنت أكيد أكيد CSE
-----------------------------------------
لما يقولك جاوب بنفس ترتيب الأسئلة (ده عمره ما حصل فى ابتدائى حتى) يبقى أنت أكيد أكيد CSE
-----------------------------------------
لما السيرفر ساعته تبقى بايظة و بدل ما العباقرة يعدلوه يقولولنا خلصوا و سلموا انتوا بدرى يبقى أنت أكيد أكيد CSE
-----------------------------------------
لما واحد بقى يسلم متأخر ساعة عن توقيت السيرفر اللى أصلا مقدم حوالى 4 ساعات و يتحسبله التسليم late يبقى أنت أكيد أكيد CSE
-----------------------------------------
لما يقولك ارفع كود الامتحان على السيرفر و تلاقيه واقع يبقى أنت أكيد أكيد CSE
-----------------------------------------
لما تجرب كود الlab على سيرفر (نظيف) و وقت التسليم يقولك جرب على سيرفر واقع يبقى أنت أكيد أكيد CSE
-----------------------------------------
لما تقعد قبل الامتحان مش عارف تحل سؤال من السنة اللى فاتت و مش عارف تسأل الدكتور أو المعيد فيه ( ولا حتى حبق :) ) و تدخل الإمتحان بقدرة قادر تلاقى نفس السؤال و طبعا تسيبه يبقى أنت أكيد أكيد CSE
-----------------------------------------
لما اتنين يدخلوا محاضرة واحد يتكتب غياب و التانى لا يبقى أنت أكيد أكيد CSE
-----------------------------------------
لما تعريف الطالب الذكى بعد كل الكلام عن العلم و الفهم فى القسم طول 4 سنين يبقى "هو الطالب اللى بيجيب درجات عالية فى الامتحانات" يبقى أنت أكيد أكيد CSE
-----------------------------------------
لما يقولك اعمل ملخص و بعد كده أنا ممكن أشيل منه حاجات !!! يبقى أنت أكيد أكيد CSE
-----------------------------------------
لما تلاقى 80 طالب قاعدين قبل الامتحان يحفظوا تعريفات و فى الاخر يطلعوا من الامتحان مش فاكرين منها حرف يبقى أنت أكيد أكيد CSE
-----------------------------------------
لما شرح المحاضرة يبقى عبارة عن قراءة الslides و الامتحان يبقى تسميعها يبقى أنت أكيد أكيد CSE
============================
============================
لما (مادة تانية) نص الدفعة (تخلع) من المحاضرة علشان مش بتفهم منها حاجة يبقى أنت أكيد أكيد CSE
----------------------------------------
لما نفس المادة تلاقى السيكشن مليان على أمل انك تفهملك أى كلمتين يبقى أنت أكيد أكيد CSE
----------------------------------------
لما يبقى المفروض إنك تحل الشيت قبل السيكشن ده على أساس إنك فهمت من المحاضرة يبقى أنت أكيد أكيد CSE
----------------------------------------
لما المعيد بقى يقولك (متكبيرش) الشيت بقى (يعنى متفهمش من المحاضرة و كمان مستخسرين فيك "درجة واحدة" على الشيت) يبقى أنت أكيد أكيد CSE
----------------------------------------
لما الدكتور يقولك الشرح بالطباشير أفيد للطالب و بعدين يقول يلا بينا نفتح الslides عشان نشرح يبقى أنت أكيد أكيد CSE
----------------------------------------
لما نفس الدكتور يضحكلك ضحكة صفرا و يفضل واقف قدامك طول الامتحان لحد ما تتشائم من حياتك نفسها يبقى أنت أكيد أكيد CSE



إلى اللقاء مع الحلقة الثانية

الثلاثاء، 8 يونيو 2010

فقرة خاصة (تيشيرت التخرج)

1-تيشرت التخرج
CSED2010.setGraduated(true)
يا ترى ايه هو الimplementation بتاع الدالة دى ؟؟؟؟؟؟؟؟؟؟؟؟؟
----------------------------------------
2-تيشرت التخرج
اختيار اللون اختيار موفق جدا فهو يدل على شعور الطلبة بعد أربع سنين داخل القسم
----------------------------------------
3-تيشرت التخرج
بعد أربع سنوات من CSE لأول مرة حنعترف إن القسم إسمه CSED
----------------------------------------
4-تيشرت التخرج
بعد الإحتفال و الصور و الذى منه يا ترى إيه حيكون مصير التيشرت؟
1-الحرق 2-الركنة فى الدولاب 3-إستخدامه بدل الفوط و المناديل ؟؟؟؟؟؟
----------------------------------------
5-تيشرت التخرج
أجمل إقتراح: إننا نمضى لبعض التيشرتات
أول مرة أعرف إن دفعتنا فيها ميسى و رونالدو و رونى-كان نفسى يبقى عندنا إبراهيم حسن أحسن
----------------------------------------
6-تيشرت التخرج
بما إننا بنحب القسم جدا كان المفروض بدل الT-shirt نعمل أحسن C-shirt أو C++Shirt
----------------------------------------
7-تيشرت التخرج
حب الدفعة للبرمجة ظاهر فى كل حاجة - حتى التيشرت بنحطله design



The best design

Special thanks to Mohamed Ezzat for his design

السبت، 5 يونيو 2010

خدعوك فقالوا 3

من طلب العلا سهر الليالى
الدليل:
من طلب العلا حل امتحانات السنين اللى فاتت
-----------------------------------------------------------------
كلية الهندسة ---> كلية عملية
الدليل:
(تخيل - Simulate - كأنه - .........) + لابات تقطيع ال(Strings) اللى (المفروض) هى مش كده بس (كأنها) كده
-----------------------------------------------------------------
من طلب العلا سهر الليالى (2)
الدليل:
نسيت كمان حاجة مهمة جدا ----> تحفظ الكود علشان انت فى كلية عملية
-----------------------------------------------------------------
لو أنت شغال بره ال(Test) ساعات بياخد وقت كبير-ممكن ترمى ال(data) النهاردة و تاخد ال(result) كمان أسبوع
الدليل:
ميعاد نزول ال(Assignment) قبلها بأسبوع و شرحه قبلها بثلاثة أيام و نبدأ إحنا فيه (علشان اللابات التانية طبعا) قبلها بيومين-يا ترى مين اللى حيلم ال(result) كمان أسبوع ؟؟؟؟؟؟؟؟؟
-----------------------------------------------------------------
احنا عندنا (نظام) ماشيين بيه يا جماعة
الدليل:
لما تسلم أربع أو خمس (Hard copy reports) و تاخد درجة اتنين منهم و الباقى يحصله (distributed) على ناس تانية-اعرف ان انت عايش فى CSE - حيث قمة النظام
-----------------------------------------------------------------
إحنا بنسمع و بنحترم رأى الطلبة
الدليل:
لو عندك (comment) اكتبه فى ورقة الإجابة - بس أنا مش حبص غير على الصح أو الغلط و بس

الأربعاء، 2 يونيو 2010

خدعوك فقالوا 2

المهم العلم يا فندم مش مهم الدرجات
الدليل:
طب ما لما هو الدرجات مش مهمة كده يبقى ليه هما اللى ياخدوا الدرجات مش احنا
--------------------------------------------------
لازم نحافظ على ال(Policies) يا فندم
الدليل:
اللابات اللى بره اللائحة :):)
--------------------------------------------------
جيد عندنا أحسن من إمتياز فى MIT
الدليل:
ترتيب الكلية على مستوى جميع الجامعات فى العالم
--------------------------------------------------
يا فندم احنا بنفيدك
الدليل:
يا فندم احنا ****** (حذفت من قبل الرقابة)
--------------------------------------------------
أنتم أحسن دفعة جت و أحسن من كل الدفعات اللى قبلكوا و يمكن اللى بعدكوا
الدليل:
مجموع الأول عندنا و الأول فى الدفعات التانية دى اللى بيقولوا عليها (مع الإعتذار للأول)
--------------------------------------------------
CSED2010.setGraduated(true);
الدليل:
الله أعلم ايه الimplementation بتاع الدالة دى من جوه شكله ايه

الثلاثاء، 1 يونيو 2010

خدعوك فقالوا 1

CSE : قسم يهدف إلى تنمية تفكيرك ولا يدعو إلى الحفظ بل إلى الفهم
الدليل:
أسئلة الإمتحانات تتكرر كل عام بدون تغيير

CSE : قسم متطور و يجعل من الطالب (عبقرينو) و أحسن من طلبة الأقسام الأخرى اللى بياخدوا كورسات كمبيوتر
الدليل:
راجع عدد خريجى القسم فى الجامعات الأولى فى العالم و قارنهم بعدد خريجى قسم آخر ككهرباء مثلاً